Tirana zyrtarizon fatin e Orges Shehit: Ky është hapi i parë i sigurt drejt një skuadre kampione

3 June, 2023

3 June, 2023

Orges Shehi do të vazhdojë të drejtojë Tiranën. Zyrtarizimi ka ardhur nga klubi kryeqytetas nëpërmjet një njoftimi në rrjetet sociale.

Trajneri i bardhebluve kishte lënë të kuptohej se po mendonte edhe largimin pas mënyrës se si skuadra e tij humbi si kampionatin, ashtu edhe Kupën e Shqipërisë në dy javët e fundit. Ofertat nga Shkëndija e Tetovës, apo edhe nga Vllaznia, dukej se ishin shumë tunduese.

Por ashtu siç shpjegoi sot gazeta “Panorama Sport”, presidenti Halili vendosi që thuajse të barazonte ofertën e Shkëndijës, për të bindur teknikun që të qëndronte në kryeqytet. Kësisoj, klubi ka konfirmuar vazhdimësinë e Shehit, duke e cilësuar si hapin e parë të sigurt drejt kthimit te titulli.

NJOFITMI I TIRANËS

Klubi i Futbollit Tirana njofton arritjen e marrëveshjes me trajnerin Orges Shehi. Pas bisedimeve mes palëve, klubi dhe tekniku vendosën të vazhdojnë bashkëpunimin mes tyre. Presidenca dhe drejtori teknik i skuadrës @tefikosmani21 shprehin falenderimet për profesionalizmin dhe punën e madhe që trajneri i dy vjeçarit të fundit ka bërë me ekipin si edhe kënaqësinë të vijojnë të kenë Orges Shehin në krye të pankinës KF Tirana. Të bindur se ky do të jetë hapi i parë i sigurtë drejt projektimit të një skuadre solide dhe kampione. I urojmë suksese trajnerit në vazhdimësinë e punës së tij nën stemën bardheblu.

PANORAMASPORT.AL