Edi Rama dhe Vangjel Tavo japin titujt e pronësisë për shtëpitë e trashëguara në Himarë, kryeministri: Do bëjmë realitet edhe mbylljen e procesit të AMTP-ve

Kryeministri Edi Rama, ndodhej në Himarë, krah kryetarit të kësaj bashkie, Vangjel Tavo, për të bërë dhënien e titujve të pronësisë për shtëpitë e trashëguara.

Sipas Ramës, ashtu siç u mbyll ky proces, do të mbyllet edhe procesi i AMTP-ve.

Më tej, ai shtoi se “askush nuk është pa hipotekë në shtëpi”.

“Duke vazhduar me dhënien e këtyre dokumenteve të shumëpritura të shtëpisë me lejoni që t’ju garantoj se ashtu siç bëmë realitet përmbylljen e këtij procesi, ashtu do bëjmë realitet edhe mbylljen e procesit të AMTP. Ky proces për ne konsiderohet i përmbyllur nga pikëpamje e qëndrimit mbi kokë edhe jashtë orarit zyrtar. Por një sërë individësh që nuk janë paraqitur, janë kërkuar nga bashkia, por nuk janë gjetur, shpresoj se në rast se na dëgjojnë të bëhen të gjallë kudo ku janë në botë dhe me gatishmëri do të marrin edhe ata dokumentin. Ajo që është e sigurt është që të gjithë banorët që janë këtu në Himarë apo janë përfshirë në këtë proces sot marrin përfundimin e procesit dhe askush nuk është pa hipotekë në shtëpi”, tha Rama.