Vuan nga probleme të shëndetit mendor, Pete Davidson: Zgjodha profesionin e gabuar

Pete Davidson është gati për të marrë pjesë në një episod nostalgjik të “Saturday Night Live”. Komediani 31-vjeçar nga Staten Island do të shfaqet në episodin e festimit të 50-vjetorit të shfaqjes, i cili do të transmetohet drejtpërdrejt në NBC dhe Peacock të dielën, më 16 shkurt.

Pak para kthimit të tij në televizion, Pete Davidson foli për PageSix dhe zbuloi se teksa kohët e fundit shikonte audicionin e tij SNL në 2014, kur ishte vetëm 20 vjeç, ai shpërtheu në lot. “Zgjodha profesionin e gabuar si dikush me probleme të shëndetit mendor,” tha ai.

Duke folur hapur për shëndetin e tij mendor, diagnozën e tij të çrregullimit të personalitetit kufitar dhe PTSD, ai përmendi se në vitet e tij të hershme në SNL ai ndjehej i izoluar për shkak të diferencës në moshë me anëtarët e tjerë të kastit. “Të gjithë ishin 10 vjet më të mëdhenj, u martuan dhe kishin fëmijë, ndërsa unë doja vetëm të luaja video lojëra”, tha ai.

Edhe pse drama e tij personale shpesh e errësoi karrierën e tij, Pete Davidson shprehu bezdi për fokusin e tepruar në jetën e tij personale. “Ishte poshtëruese, doja që ata të shkruanin për punën time, jo me kë po dilja,” tha ajo.

Aktori ka qenë i lidhur me femra të famshme, përfshirë Kim Kardashian, Ariana Grande dhe Kate Beckinsale.

Tani, pas gjashtë muajsh abstenim nga marrëdhëniet, droga dhe rrjetet sociale, ai po fokusohet në shëndetin dhe karrierën e tij, madje duke hequr edhe tatuazhet. Me ndihmën e trajnerit të tij personal, Chris Howard, ai ka transformuar gjendjen e tij fizike dhe thotë se është gati të “trondisë” Hollywood-in, frymëzuar nga kalimi i Adam Sandler nga komedia në dramë.