LaCivita krah opozitës, Vangjeli: Nuk është lobim e as menaxhim i fushatës elektorale të PD! Është shpresa për të anashkaluar instrumentin e shpalljes non grata të Berishës
Analisti Lorenc Vangjeli, nuk e konsideron ardhjen e Chris LaCivita në Tiranë, as si lobim dhe as si menaxhim të fushatës elektorale të Partisë Demokratike.
I ftuar në emisionin “Log” në News 24, Vangjeli u shpreh se prezenca e LaCivita në Tiranë, për atë është “shpresë për të anashkaluar instrumentin e shpalljes non grata të Berishës, për një festë të mundshme politike në Uashington”.
Vangjeli u shpreh se te demokratët “është krijuar ideja se pushteti në Tiranë do të vijë nga ndryshimi i humorit në Uashington”, por shtoi se gjatë këtyre viteve edhe kryeministri Edi Rama ka forcuar lidhjet me njerëz të afërt të Trump dhe pjesëtarët e administratës së tij të re.
Lorenc Vangjeli: Pas tre vjetësh shumë të gjatë të PD, kjo është çarje e parë e izolimit, e rrethimit, nisur që nga shpallja e Berishës non grata.
Ardhja e këtij ekipi, se LaCivita nuk është i vetëm, nuk është lobim, por as menaxhim i fushatës se ardhshme elektorale. Është shpresa për të anashkaluar instrumentin e shpalljes non grata të Zotit Berisha, për një festë të mundshme politike në Uashington.
Kemi një ndryshim të kursit, se nga sovranizmi i djeshëm i deklaruar, sot te demokratët është krijuar ideja se pushteti në Tiranë do të vijë nga ndryshimi i humorit në Uashington.
Ajo që duhet mbajtur shënim është se qoftë në mandatin e parë të Trump, qoftë gjatë kalvarit që katër viteve të presidencës Biden, Rama ka instaluar dhe ka forcuar fort një seri lidhjesh me njerëzit e afërt të zotit Trump dhe pjesëtarët e administratës së re. Kjo e bën garën më të barabartë.
