Direkt në fushë, nis puna te Vllaznia për duelin me Tiranën

Pavarësisht ndeshjes së të mërkurës ndaj Partizanit në kuadër të javës së 28-të të Superiores ku Vllaznia fitoi me rezultatin 2-0, kuqeblutë nuk e kanë ndalur ritmin e stërvitjeve.

Kështu, ekipi i drejtuar nga Brdariç ka dalë në fushën stërvitore ditën e enjte, duke nisur kështu përgatitjet për ndeshjen e radhës kundër Tiranës, pavarësisht se procesi stërvitor i kuqebluve nuk ka pasur intensitetin e stërvitjeve të zakonshme. Seanca ka qenë e një tipi rikuperues, ku janë zhvilluar edhe disa manovra taktike.

Kjo në mënyrë që futbollistët titullarë të mos kenë një mbingarkesë fizike, që mund të çojë në dëmtimin e mundshëm të tyre. Një intensitet më të lartë të stërvitjes kanë pasur futbollistët, të cilët nuk patën mundësi të zbrisnin në fushë në ndeshjen e fundit. E ndërsa shenja pozitive ka dhënë edhe Kahrimanoviç. Mesfushori kroat pritet të rikthehet të jetë i gatshëm për të zbritur në fushë pas ndeshjes “klasike” me Tiranën.