“Siguria ushqimore”/ Berisha: Kontrolli i ushqimeve në “duart” e mafies! Shqipëria nuk plotëson asnjë standard të BE-së

Kreu i Partisë Demokratike, Sali Berisha, ka ngritur akuza të rënda gjatë Konferencës për Sigurinë Ushqimore, duke deklaruar se kontrolli mbi ushqimet në Shqipëri ndodhet në ‘duart e mafies’. Ai e cilësoi situatën alarmante, duke theksuar se është vetë “mafia shtetërore” ajo që kontrollon sektorin e sigurisë ushqimore, i cili sipas tij është një nga më të rëndësishmit për shëndetin e qytetarëve.

Berisha u shpreh se Shqipëria nuk plotëson asnjë nga standardet e Bashkimit Europian për sigurinë ushqimore, duke theksuar se pavarësisht pranisë së ekspertëve të kualifikuar, ata janë të përjashtuar nga proceset vendimmarrëse. Sipas tij, kontrollet bëhen nga struktura të korruptuara, të cilat pengojnë përfshirjen e investitorëve të huaj dhe zhvillimin e sektorit me cilësi europiane.

Ai kritikoi ashpër edhe mënyrën se si menaxhohen prokurimet publike, duke thënë se në 99% të rasteve ato fitohen nga kompani shqiptare, ndërsa të huajt përjashtohen përmes burokracive të qëllimshme. “Kanë vënë rregull që dokumentet duhen për 38 ditë, dhe i huaji paraqitet vetëm pasi është firmosur prokurimi,” deklaroi ai, duke e quajtur këtë një pengesë të qëllimshme ndaj konkurencës së ndershme.

Berisha theksoi se siguria ushqimore është drejtpërdrejt e lidhur me shëndetin e qytetarëve dhe kërkoi ndërhyrje të menjëhershme për ta nxjerrë këtë sektor nga duart e interesave mafioze.

Kreu i PD Sali Berisha në Konferencën për Sigurinë ushqimore: Kontrolli i ushqimeve është në duart e mafies. Është mafia shtetërore që ka në dorë, këtë siguri, që është siguria më e rëndësishme. Shqipëria nuk ka siguri juridike, pasi qytetarët rrijnë 10-15 vite për një proces gjyqësor. Shqipëria ka ekspertë shumë të mirë për sigurinë ushqimore, por ata janë të margjinalizuar. Po, kontrollet janë në kthetrat e mafies. Shqipëria nuk ka asnjë standard të BE-së. Prokurimet bëhen në 99 përqind të rasteve me shqiptarë, jo të huaj, ndërkohë që marrëveshja me BE-në, e detyron Shqipërinë të jetë e hapur për investitorët shqiptarë dhe europianë. Të huajt bëjnë punë me më cilësi, por këta ‘i fshijnë’. Kanë vënë rregull që dokumentet duhen për 38 ditë dhe çdo i huaj që i dorëzon me E-Albania, paraqitet pasi është firmosur prokurimi. Siguria ushqimore lidhet direkt me shëndetin.