KQZ vendos mbajtjen e zgjedhjeve në Rrogozhinë në 23 korrik, bashkia e Kukësit ende pa datë pas shkarkimit të Gjicit

KQZ ka propozuar që përsëritja e zgjedhjeve për bashkinë e Rrogozhinës, do të mbahen më 23 korrik, ndërsa të hënën pritet që të vendoset zyrtarisht pas mbledhjes.

“Zgjedhjet për kryetarin e Bashkisë Rrogozhinë të përsëriten në datën 23 Korrik 2023. Ky vendim hyn në fuqi menjëherë dhe publikohet në faqen elektronike zyrtare të Komisionit Qendror të Zgjedhjeve. Kundër këtij vendimi mund të bëhet ankim në Komisionin e Ankimimeve dhe Sanksioneve, brenda 3 (tre) ditëve nga shpallja e tij”, njofton KQZ.

Ndërkohë kujtojmë se ende nuk ka një datë për përsëritjen e zgjedhjeve në Kukës, pas shkarkimit të Safet Gjicit.

Më herët Kolegji Zgjedhor vendosi se në Rrogozhinë do të përsëriten zgjedhjet, duke pranuar kërkesën e koalicionit “Bashkë Fitojmë”, për pavlefshmërinë e rezultatit për kutinë e burgut. Kjo pasi diferenca e votave mes dy kandidatëve, ishte më e vogël se ajo e pjesëmarrësve në votime në këtë QV.